Sadtong nagligad lang nga semana may ara mga social media posts may kaangtanan sa “dog incident” nga nagluntad sa Bago City kung sa diin imbolbado ang isa sa mga empleyado ka kooperatiba.

Ang Central Negros Electric Cooperative, Inc. (CENECO) ang naga-kondenar gid sang pagpang-abuso sang mga kasapatan angot sa RA 8485 ukon Animal Welfare Act of 1998.

Angot sa nasambit nga insidente, ang CENECO nagpatigayon sang imbestigasyon kag nadiskubrehan nga ang nasambit nga ido amo ang may ara na nga daan sang mga masakit sa panit nga makita sa iya itsura bag-o matabo ang insidente. Dugang pa, wala maayo masekyar ang cage sini, may malaba nga higot, kag naplastar lamang ang ido sa kilid sang dalan, salungat sa mga naga-circular nga pictures sini sa social media.

Sa amon nga pag-usisa, nahibaluan nga ang empleyado nagdepensa lamang para sa iya seguridad bangod ginkagat sang nasambit nga ido ang footrest sang iya motor, rason nga dutayan lang ini matumba.

Nakig-angot ang CENECO sa Barangay kung sa diin nagluntad ang insidente para ipa-summon ang nagpalapta sang “false information” sa social media.

Gani, ang CENECO nagapangabay sa tanan nga indi dali-dali nga magpati sa makita sa social media.

Dugang pa, ginapahanumdom ang tanan nga pet-owners nga mangin responsable sa pagsekyar sang ila mga kasapatan para sa seguridad sang tanan. ##